當年今日

股路縱橫:上石化經營改善私有化快掂

蘋果日報 2006/09/04 00:00


港股升上前高位17500關口爭持,後市繼續向好的機會較大,年底前,恒指可升上18000至18500。
總結一下近期幾隻推介股嘅表現。創富(340)上周五再發力,搶上0.94元,再創新高,市場消息甚勁,傳短期目標價1.20元。幕後人士自然信心爆棚,更話到明會見2字頭,但筆者就認為要睇事態發展而定,若一切順利,當然冇問題,甚至超2趕3亦有可能。玩呢類大風險股,一定要金睛火眼,昅到實,總之一路上移止賺位,就可以大賺特賺。
金威集團(910)係咁慢火煎魚,幕後人財力雄厚,股價上到呢個位,街外貨源已收到八八九九,只要時機配合,相信幕後人會發動一次急升,升幅應會有40至50%。
今日講上海石化(338),私有化等等等,頸都長。不過,睇股價近期略為轉強嘅表現,相信好事快近。
業績有望好轉
由於原油價急升,上石化經營雖陷困境,但其實情況已開始有改善。目前原油價已回落到60美元水平,中國推出成品油價格機制嘅時機已成熟,新機制會與原油價掛鈎,對上石化好有利。
上石化今年首季虧蝕1.54億元(人民幣.下同),第2季已好轉,上半年已微賺569萬元,下半年應會再有改善。中銀研究報告就預測上石化06年全年可賺3.24億元,而內地逐步調升成品油價後,上石化明年更會大賺41億元,維持其「優於大市」評級,目標價由4.27港元調升至4.46港元。
上石化母公司中石化(386)正進行股改,上石化話明不會股改,年底前要私有化的機會達到九成九,即使以2倍NAV計,私有價最少係5.10元。
郭兆誠
empty