《壹錘定音》主持李慧玲噚日落金鐘佔領區做直播訪問，訪問李柱銘與學聯代表梁麗幗，忽然間有位「挑機男」打斷訪問，一輪嘴發表兩分鐘政見。呢位「挑機男」並唔係普通白領，而係美資大行摩通中國企業融資部主管David Lau（劉伯偉），董事總經理（MD）級數，屬高層，喺投資銀行界好多人識㗎。
身穿藍恤衫、無打呔嘅David噚日走近梁麗幗，一開波就話「香港有好多人反對佔中」，在場人士勸佢冷靜啲，佢就舉高雙手，立即就俾梁麗幗寸：「你放心，呢度冇人襲擊你」。

金融界多人識　專做IPO

David之後繼續不停口，話佔中「多數人反對，少數人支持」，如果民主係少數服從多數，「（佔中者）最不民主」。
當李柱銘質疑佢指90萬人反佔中嘅可靠性，同埋當中有幾多收錢。David就終於似番個中環精英咁，快速用中英文回應：「嗱，你唔可以咁講，That is the only data available……佔中嘅人唔可以收錢㗎咩？」
《壹錘定音》直播時間係早上10點至中午，照計係辦公時間，唔知David係咁啱行過，抑或有心去踩場呢？呢位David喺金融界都好多人識㗎，佢專做新股（IPO），負責湊內地企業嚟香港上市。過去做過唔少大刁，例如周大福（1929）同中石化煉化（2386）IPO咁。
最近就應該埋頭苦幹幫香港航空上市，爭取做第一隻雙幣雙股。不過有投行中人就話，摩通捲入聘請官二代醜聞，為免瓜田李下，已經避嫌做少好多生意。
David話自己係代表香港沉默大多數，但今時今日嘅政治氣候，略為有頭有臉嘅人發表政見，分分鐘拖埋公司落水。David話呢番係個人意見。摩通發言人表示，有關David個人言論，不代表公司立場呀！

李華華
mailto:[email protected]