童星出身嘅15歲男星王晳鉉，因有份演出由車太鉉、朴寶英主演嘅賣座電影《極速緋聞》而為人熟悉，不過近日王晳鉉被爆受到死亡威脅，引起粉絲及網民關注。

據王晳鉉嘅所屬事務所表示：「於本月20號，王晳鉉嘅學校及事務所都收到恐嚇電話，對方自稱係『機械物流協會』嘅一員，聲稱要殺咗王晳鉉，學校隨即報警求助，而事務所亦委託首爾城東警署展開調查。警方嘅調查顯示，涉案人A某所使用嘅電話係公共電話，而據CCTV錄得嘅影像發現，A某係王晳鉉嘅粉絲，警方已經拘捕A某，並移交到檢察廳。」

事務所嘅聲明中續指：「目前王晳鉉會盡量避免外出，外出時亦有經理人同行，同時亦請咗保鑣，將會努力做好貼身保護。」據悉A某係一名30多歲嘅男子，喺接受警方調查時供稱自己係王晳鉉多年嘅粉絲，因為一直見唔到佢先萌生殺意。

精選韓流，喺晒《娛果》
http://fb.com/appledailyent