對於做咗好幾年財委會主席嘅陳健波表現，唔同人有唔同評價，建制派支持者就鍾意波哥夠辣、敢於剪布，民主派支持者就覺得佢太辣、濫權，之前仲試過俾成班民主派議員圍佢。如果八方話，民主派成班議員一齊拍枱為波哥叫好支持，係咪有人覺得係天方夜譚？不過立法會噚日真係發生咗呢一幕！
話說林鄭噚日喺答問大會總共答咗17位議員嘅問題，波哥都排得比較後，佢一開口就開始呻，話佢主持財委會呢個月嚟嘅進度即使快咗，但仲係有好多項目積壓，要喺今年7月前審議完有好大難度。

指唔聚焦答非所問

八方一聽到呢度，以為波哥又準備力數民主派嘅種種不是，點知波哥話鋒一轉，話佢特別關注啲官員答議員問題嘅方法同水平，佢指雖然有啲官答得係有理有據，但亦有啲官答得唔聚焦，答非所問，有啲仲成日搬條line to take出嚟，真係令人懷疑佢哋有冇誠意，要求林鄭講吓點提升官員答嘢嘅質素。
唔少民主派聽完波哥嘅發言都忍唔住拍枱讚好。唔想得失波哥，又唔想貶低自己夥計嘅林鄭話，官員答嘢嘅水平永遠都有改善空間嘅，正如佢都覺得𠵱家嘅佢比半年前答得好啦。波哥亦乘勝追擊，提議林鄭請佢同啲官分享交流吓，畀佢哋盡訴心中情。林鄭又還招，話自己做庫務嘅時候坐過3年財委會，當時佢有開班教其他官點答，當然如果波哥肯親自操刀，以財委會主席身份教，佢會馬上安排。

李八方