大受歡迎嘅BL神劇《大叔的愛》由日本hit到亞洲各地，由男星田中圭飾演戇直男主角春田創一，好戲大叔吉田鋼太郎扮演同志上司，仲有林遣都演同事兼室友阿牧，發展出搞笑又複雜嘅職場HeHe關係。

劇集播出後掀起連串話題及現像，帶挈田中圭入行18年終吐氣揚眉躋身紅人行列。日本電視雜誌《The Television》每季舉辦嘅「第97屆日劇奧斯卡」，正為今年4月至6月日劇展開人氣投票，雖然本月10日才會截止，但昨日官網已率先公佈目前走勢，現階段超過16萬票，《大叔的愛》以大熱姿態暫奪各組別第一名，除咗大叔吉田鋼太郎未能入圍爭視后之外，其餘獎項都似乎十拿九穩。

《大叔的愛》暫時成為最佳劇集大熱，拋離二宮和也嘅《黑色止血鉗》及藤岡靛擔正嘅《基督山伯爵─華麗的復仇─》，而田中圭及林遣都分別排在最佳男主角及最佳男配角榜首，連最佳女配角現時三甲都屬《大叔的愛》天下，劇中兩位女星內田理央和大塚寧寧同佔前兩名，仲有男子組合Sukimaswitch為《大叔的愛》唱出嘅主題曲《Revival》都暫列最佳劇集歌曲No.1。

最佳女主角方面，長澤正美憑破格演出嘅口碑劇《信用欺詐師》排名冠軍，《花過天晴花男Next Season》嘅杉咲花、《正義檢事》嘅吉高由里子都順序打入三甲。

精選娛聞，喺晒《娛果》
http://fb.com/appledailyent