惠英紅、陳麗雲、余世滕合演港台劇單元故事《人間有情》，今日到深水埗南昌邨實景拍攝，小紅姐演一位屋邨師奶照顧劇中患病老公，佢話劇本好有意思，所以睇完即刻接拍。被問到會否返大台拍劇？小紅姐話要睇啱劇本先，去邊都冇所謂。

小紅姐話上一次為港台拍劇都差唔多十六年前，近日開工仲發生咗啲尷尬事，佢話:「擺咗大烏龍，唔知食飯係要自己俾錢，我食完就行咗去，後來先知導演幫我俾，好尷尬。」喺劇中小紅姐要照顧身體癱瘓嘅老公，小紅姐話:「故事係真人真事，亦好貼近我生活，我媽咪有老人痴呆長期卧床，好多動作都熟練，唔使專登去學；有時唔係計較錢，有啲回饋社會，等多啲人關注呢類家庭，造型好醜樣都冇所謂。」

現實中嘅小紅姐一有時間就會親身照顧媽咪，佢又話:「噚日自己有啲疏忽，扶媽咪落床嗰陣佢掙扎，先後鋤損咗兩邊手踭，甩咗一大塊皮流血。我即刻幫手止血包紮傷口，始終老人家會復原慢，自己都好心痛，咁耐以嚟第一次整損媽咪，自己都俾屋企人鬧我死頂。」小紅姐稍後會返內地宣傳電影，及到美國領取一個影展頒發嘅個人獎項，揚威海外，不過小紅姐則未肯透露係咩獎，話到時大家會知道。