當年今日
關於我們

戶田惠梨香再演彌海砂拯救《死亡筆記2016》

蘋果日報 2016/03/09 06:00

蘋果即時死亡筆記L松山研一戶田惠梨香彌海砂池松壯亮夜神月東出昌大菅田將暉死亡筆記2016

改編自漫畫的日本電影《死亡筆記》,十年前曾瘋魔亞洲各地,令到扮演L嘅松山研一同埋扮演彌海砂一角嘅戶田惠梨香喺日本上位。之後《死亡筆記》拍過外傳,之後上年又拍過劇集,都被指唔及第一套電影咁出色。早前又再宣佈今年推出新版電影《死亡筆記2016》,但全部換晒一班主角,終於電影公司今日宣佈,係首部電影中演扮演彌海砂嘅戶田惠梨香,將再次喺新版電影中扮番彌海砂。

《死亡筆記2016》係講主角L同夜神月死後十年嘅故事,由東出昌大、池松壯亮同菅田將暉三名新上位男星演出,仲要搞出6本死亡筆記,粉絲覺得冇咗L同夜神月兩名主角,就冇乜興趣,好彩終於都有個原裝彌海砂戶田惠梨香演出,提高番班《死亡》粉絲嘅興趣,而戶田自己都好高興,佢話第一個反應係「唔係啩?真係㗎?」仲話十年前佢首次演電影就喺呢套,估唔到十年後可以做番同一個角色,不過,佢話都好煩惱,唔知應該點演繹十年後嘅彌海砂喎。