四年一度嘅奧運會明年首次喺和平崛起嘅神州大地上舉行，隨住奧運吉祥物福娃誕生；選手村、各大小體育場館興建得如火如荼之際，奧運另一「代言物」──奧運火炬嘅設計亦大功告成，仲取名「祥雲」，相信係繼「觔斗雲」以來至出名嘅一嚿雲嘞！香港特區向來被阿爺照顧，除咗醒我哋協辦馬術項目，香港人仲有機會高舉「祥雲」，擔起運送聖火呢個神聖任務㖭，不過要先符合兩個基本條件，就係有強健體魄同鍾意運動。

做咗北京奧運會贊助商嘅聯想集團仲有個水蛇春咁長嘅名銜，就係「北京奧林匹克火炬接力全球合作伙伴」，而且佢哋仲有權選出1,000個火炬手。聯想副總裁李嵐話，為咗令香港市民體驗奧運精神，遲啲會搞個火炬手選拔賽，揀一啲對體育運動有興趣嘅人參與其中，手持「祥雲」跑幾百米，為北京奧運出一分力。
李嵐話，火炬手責任好重大，萬萬不能夠跑跑吓跌咗嚿（祥）雲，所以對火炬手嘅體能有少少要求，起碼跑1,000米都唔會點索氣，仲要隻手夠力一路舉起支重985克嘅「祥雲」。至於幾時開始招募、香港人佔幾多個等等，聯想話未定，但一定係公平、公開同高透明度下篩選，絕對唔會小圈子選舉，偏幫自己友。過往做過大型運動會火炬手嘅香港人都係知名人士，好似方力申、成龍、電盈總裁陳紀新等等，好少話一般平民百姓你我他可以參加公開選拔。

立法會議員梁國雄就搶閘同八方講，佢會申請做火炬手，以示對祖國支持。長毛話，自己雖然係煙民，但體力一啲都唔差，跑二、三千米都濕濕碎，你睇佢踢波踢到好似AC米蘭個加度素咁好氣好力，就知區區嗰1,000米難唔到佢啦。長毛又話如果一旦被選中，一定會着件寫住「毋忘六四」嘅T恤，一邊跑一邊高叫「平反六四」嘅口號。
以體能好見稱嘅立法會波牛陳偉業反而話唔會爭做火炬手，佢話萬一真係俾聯想選中，會俾人話佢議員同商界勾結，為咗避嫌，所以唔會參加選拔咁話。
講番支「祥雲」，負責設計嘅聯想集團話，今次係集合幾十個來自平面設計、人類學及機械工程等唔同界別嘅專業人士，花咗一年多時間精心炮製嘅成果；奧運火炬最緊要係代表到主辦國特色，所以糅合咗中國四大發明之一嘅紙，以紙卷設計火炬嘅造型，再加上象徵華夏文化嘅雲紋圖案，同埋寓意好意頭嘅漆紅色，以凸顯中國五千年歷史文化咁話，真係物輕意義重。