今年金像獎最佳電影《樹大招風》由三位鮮浪潮導演許學文、歐文傑同黃偉傑執導，電影嘅命題係三大賊王嘅結局，係「偶然」定係「必然」嘅結局。引伸到香港電影喺回歸20年之後，港產片迷都會問，合拍片係咪已經成為必然嘅結果。導演杜琪峯早前喺觀塘寫字樓接受訪問，佢提供咗一個肯定嘅答案話：「香港成為中國電影嘅一部份呢個必然嘅，97後至到近年嚟更明顯，睇嚟再十年二十年都會係咁樣。」港片買少見少，合拍片成行成市，但杜琪峯講明唔會放棄拍港片。他笑言因為一離開深圳，踏出飛機嗰一刻，已經唔識講同唔識聽，可以講又聾、又啞：「唔識寫嘢喇，唔識去講嘢。唔係話人地有問題，係我有問題。最重要我嘅信念會係對香港電影，嗰個熱情係香港，呢個係我認識嘅地方。」

但佢強調一個事實，既然合拍片係必然，而你又要拍嘅話，就唔該唔好借呢樣嘢，挑戰政治上嘅問題，佢話：「呢個無謂嘅事嚟，如果係咁你何必要合拍呢。香港好多電影，只要唔涉及呢啲問題，都可以拍。反而我有一個想法，有機會會再多啲時間去拍香港電影，唔理送唔送審，乜都唔駛理，拍我自己點睇，想表達嘅嘢，呢個係我追求同我必須要做嘅事。」

唔少人視杜琪峯為鮮浪朝電影計劃嘅教父，目前嘅收成可以視為一個必然嘅結果。杜琪峯十年前進入藝發局，搞鮮浪潮電影比賽，當時已預料至少三屆(共9年)先會有成績，佢笑住話：「除非有天才。呢個步伐係我當日預測。剛巧十年，先至出現咗一班有唔同想法嘅後生仔。」杜琪峯作為先導者，佢覺得自己有責任為呢班新生代提供平台同渠道，只要佢哋認為有得做，專案都會盡量去協助。

喺97年前杜琪峯監製咗《一個字頭的誕生》，唔少人覺得係隱喻香港人面對回歸前嘅徬徨，就好似戲入面主角劉青雲嘅選擇。杜琪峯解釋成個都係導演韋家輝嘅故仔，至於後人同影評點解解讀，自己就好難判斷：「韋家輝當年傾偈時講，其實佢講人生裏面遇到嗰個三叉口，《一個字頭》最重要嘅係講你嘅選擇。有見招拆招、有隨波逐流，好似劉青雲呢個角色，可能行幾步已經消失咗係呢個江湖。」

香港回歸20年，政治體制同內地越走越近，港片漸變成稀有。回歸前杜琪峯監製過一部電影《一個字頭的誕生》，有人將此喻看成是預示香港人對回歸的抉擇。展望香港電影未來，杜琪峯斷言「香港成為中國電影嘅一部份呢個必然嘅」，但他依然不會放棄拍攝純港片的機會，鮮浪潮會是港片另一出路。

採訪：何永寧
攝影：沈健程