由80年代活躍至今嘅填詞人陳少琪，曾為達明一派、張國榮、梅艷芳、張學友等巨星寫歌，近年工作範圍拓展到內地，先後為08年北京奧運、10年上海世博寫宣傳歌，成立了黑芝麻文化娛樂。見證着時代變遷嘅陳少琪，認為回歸後香港樂壇失去了聚光燈：「因為我入行時，香港嘅聚光燈範圍好強，成個亞洲都望住做中心，但當有日其他地方音樂掘起，每個地方嘅人做番本土文化，佢哋漸漸就唔會關注廣東歌！」

陳少琪認為回歸後樂壇最大變化，唔再被卡拉ok主宰音樂創作：「以前究竟做啲歌係畀人聽定畀人唱？但20年過去，最近製作方向已經唔係針對卡拉ok，音樂唔使再遷就市場，香港近幾年唔再係K歌。」雖然音樂多元化了，但市場卻萎縮，陳少琪表示：「群眾對音樂需求永遠唔會少，o依家所有嘢視頻先行，音樂要用手段吸眼球，改變咗成個行業，用單曲吸引人越嚟越難，令好多傳統做開音樂嘅人措手不及，大家都要搵出路，變咗各施各法，高雅、文青、低俗都得，無論幾大牌或新人都好，你得就好多人睇，唔得就算幾出名都冇用。」

基於時代變遷，陳少琪屬於早期北上嘅音樂人：「05年之前已經好多內地工作，包括廣告、製作，唔止歌詞，當時香港已經回歸咗，睇到成個舞台大咗好多，有次喺北京零下7度，我喺街用手機聽當地流行榜，發覺內地少聽廣東歌，當時我40歲，如果繼續喺comfort zone可以好舒服，但自己唔忿氣，所以喺完全冇任何收入保障下，先租間屋搬上去住慢慢做，o依家香港同內地都有公司，但喺我嘅創作方案裏面，好鍾意用中港台朋友做交流，呢個先係大舞台嘅音樂生態。」