韓國男團JYJ今晚喺台灣嘅南港展覽館舉行演唱會，現場氣氛熱烈。不過晏晝舉行嘅記者會就火藥味重，短短15分鐘嘅活動竟然爆發衝突。

因為主辦單位事前冇同韓方溝通好JYJ三子答問題期間可唔可以影相，結果記招開始咗唔夠5分鐘，金在中都未分享踩過界拍戲嘅心得，攝影記者就拉隊離場抗議，嚇到朴有天都呆一呆，做唇形問工作人員：「做乜嘢？」氣氛尷尬。金在中見到攝記拉隊走，仍然好鎮定地回應：「拍戲能夠透過角色詮釋唔同嘅人生，好有趣。」

為咗打圓場，JYJ喺記者會結束8分鐘後特地再現身，展示笑容畀大家影個夠。