當年今日
關於我們

【馬尼拉直擊】「水行俠」積遜狂野拗斷戰戟 小粉絲衝上台獲主角抱抱

蘋果日報 2018/12/12 11:49

温子仁水行俠安芭赫德

即將於本月20日上映嘅DC大作《水行俠》(Aquaman)於中國大收,男主角積遜莫瑪(Jason Momoa)、女主角安芭赫德(Amber Heard)及導演温子仁(James Wan)就專程再次到訪亞洲,飛抵菲律賓馬尼拉出席記者會及紅地毯活動。於噚晚嘅紅地毯上,幾位除咗接受《蘋果》訪問,亦同粉絲見面。會場上有好多粉絲一早已到達等候,仲有唔少拎住自己嘅親筆畫作畀幾位簽名,而幾位都有求必應,又自拍又簽個不停。
積遜莫瑪明顯非常興奮,簽簽下突然繞場跑一圈,精力旺盛。之後到台上活動開始之前播片,佢又突然自己走上台,瞓於台上欣賞片段,夠晒率性。幾位上台後,大會就送出請畫家畫出幾位嘅畫像,影完相之後,積遜又突然從後抱住畫家伯伯,嚇到伯伯個心都離一離。
積遜莫瑪表示:「我真係太被愛,多謝馬尼拉,我人生都未試過接收咁多愛,我愛你哋!」之後溫子仁亦表示:「希望大家會鍾意呢部精彩嘅動作電影,欣賞當中視覺效果,同埋睇到兩位主角水行俠同Mira嘅合作。」安芭就叫大家記得留意佢哋於市內拍嗰場動作戲,保證大家會鍾意。作為混血兒,積遜莫瑪就表示好開心可以代表另一個種族膚色去演超級英雄,又話:「呢套戲對我嚟講就係全世界最重要。」表示自己超愛呢套戲,仲興奮大聲狂叫。講完之後,積遜繼續發揮野性本色,大力揮動手上戰戟,整咗幾次之後連支戰戟都斷埋,佢就索性一手拗斷戰戟,非常狂野。到一眾演員離開時,台下突然有個小朋友衝上台緊抱積遜,但可能因為見對方係小朋友,積遜都親切擁抱,之後安芭及溫子仁都有同小朋友抱抱先離開,保安都無攔阻。

精選娛聞,喺晒《娛果》
http://fb.com/appledailyent
empty
會場上有好多粉絲一早已到達等候,「水行俠」積遜莫瑪好親民
empty
安芭赫德性感現身
empty
積遜莫瑪明顯非常興奮,瞓於台上欣賞片段
empty
積遜莫瑪、安芭赫德同導演温子仁收到畫作好開心
empty
積遜又突然從後抱住畫家伯伯
empty
積遜整斷戰戟
empty
台下突然有個小朋友衝上台緊抱積遜
empty
積遜都親切擁抱