工業界立法會議員林大輝（大師），將退下火線，噚日佢趁前往內地睇曼聯對曼城表演賽前，請傳媒食晏當餞別，除咗親自去書展買咗30幾本聖嚴法師著作送畀記者，仲不忘講講8年議員生涯最難忘嘅人同事，講緊嘅就係教育局長吳克儉同特首梁振英。
大師話永遠唔會忘記吳得掂，當年因為吳得掂寧去旅行、都唔出席大師做主席嘅教育事務委員會開會，搞到大師都發火。八方順勢叫大師推介一本書吳得掂，大師就推介《工作好修行》，冀吳局長明白工作重要性，「唔係旅行好修行」。

讚財爺林鄭贏CY

大師最難忘仲有CY！佢記得CY初上台時，佢曾喺答問大會贈過CY一句：「因果循環，報應不爽」！呢句話又真係預言得好準喎！至於曾俊華同林鄭兩位黑馬，大師話鬍鬚曾份預算案如同特首政綱，林鄭「拭目以待」論亦暗示想更上一層樓，佢就覺得兩人誠信高過CY，能力唔比CY差，但感情上佢就只會支持鬍鬚曾，認為兩人心靈上溝通到喎。
大師講完笑，就講番自己唔繼續參選，係經過深思熟慮，自問任內能力不足、表現唔好，唔信自己再做4年會脫胎換骨，所以決定趁自己「登六」前，先停一停諗一諗，進行多啲修練同修行，未來再喺其他平台發揮，佢更預告其中兩樣搞作，就係會參選選委，同搞南華足球青訓。

寸鼠王芬樣假　MC興唔夠硬

林大輝自己唔選立法會，但屬九龍西選民嘅佢，對選舉仲好關心，大師話最近收到梁美芬宣傳單張，話見到單張中嘅女士面尖尖，唔睇名完全認唔出係梁美芬，令佢驚嘆「現代科技發展得唔錯」，但就話梁美芬不在佢投票考慮之列，因為佢「只會投畀真的人」喎。
至於講到超區候選人，平日經常用午餐肉同假鉸剪批評拉布嘅「MC興」王國興，大師就話覺得午餐肉比喻唔夠形象化，覺得用蘋果或者蛋更好，又批評MC興把鉸剪軟「瀨瀨」，「我做開呢行（紡織界）㗎！知佢根本一塊布都剪唔到！」話一定唔會投畀MC興。至於白鴿黨鄺俊宇，大師話冇睇過佢啲書，不過佢都知鄺仔同逗號係永不分離，但似乎唔多欣賞，反問八方：「係咪部印刷機有問題？」

李八方
mailto:[email protected]