郭富城今日同被指係拆散佢同熊黛林嘅緋聞女友苟芸慧，出席LONGINES全球最大旗艦店剪綵儀式，心情大靚嘅城城，狀甚風騷，見到苟姑娘亦有傾有講，絕無尷尬。

問到再遇緋聞女友苟芸慧，城城讚對方狀態好好，絕對係女神，期待再有合作。對於獲城城讚美，苟芸慧連聲多謝，佢透露平日服用甲狀腺藥，令心跳加速，問佢見到城城有冇令心跳加速？佢甜笑話：「你話呢？我今日未食藥。」

另外，有指城城喺instagram識關注唔少0靚模，城城斥報道斷章取義，係刻意中傷同抹黑。

佢強調自己喺微博同instagram，都有關注唔同人士，佢仲數出喺180位被關注者中，有70位係男人，有12位係學者同6位畫家，質疑點解又唔去寫呢啲關注出嚟，並再以荒謬形容該篇報道。

城城又指自己日常生活時間，主要放喺工作上，網絡社交平台並唔係生活中主題。之後城城突然轉話題，指近日有所領悟，佢話為電影而練武，令腳傷也加速痊癒，城城話：「從中領悟到『天地有正氣，退一步海闊天空』。」