唔只女大十八變，男大一樣可以變變變。前立法會建築、測量及都市規劃界代表謝偉銓（Tony）形象沉默嚴肅，估唔到少男時代卻走不羈鬈毛日系風，做童軍時擺春睡pose，彈結他兼學影相，皆因係追女必備。
現年63歲嘅Tony五姐弟中做二哥，約8歲時來港，入小學初期好艱苦，「英文真係好唔掂」，但靠努力終成校內優異生，聲言未試過考第二。學業成績進步神速，皆因有強記能力，「如果嗰晚唔記得讀書，就用小息嗰10分鐘記住」。
入讀賽馬會官立中學，讀書外都參加愛丁堡計劃、聖約翰救傷隊，又學影相兼彈結他，「梗係啦，追女仔就係靠呢兩樣嘢嘛」。咁咪追咗好多女？佢笑咪咪咁話冇，可能怕太太呷醋，皆因謝太係低佢兩級嘅學妹，撻着卻係大學畢業後嘅事。

自爆讀中學多粉絲

當年係領袖生亦有搞學生會嘅Tony自言對衣着都有啲要求，笑稱校內男女Fans都唔少。讀過一個月預科冇繼續，「覺得啲數學第時都唔會用，讀到咁高深都冇用」，之後用番中五成績報讀理工學院測量系，係理工學院首屆學生。
1976年畢業後佢加入政府工務局做見習產業測量師，曾經大膽去信部門阿頭質問點解冇得保送去英國研習？之後俾鬼佬上司蝦，佢主動要求調部門，升至高級產業測量師後就跳入商界：「吐咗一口烏氣，仲唔走人呀？」