二線股大洗倉,有質素嘅都照俾掟到甩轆,金天醫藥(2211)亦唔例外。但講到實體零售業,金天嘅PE平霸;講啱發展電子醫藥商務,市值亦平過中信21世紀(241)九條街,「虛、實」兩相宜,金天大平賣!
金天係祖國東北最大醫藥零售連銷店及分銷商,屬架勢堂級數,而啱啱公佈2013年嘅業績,純利大增66%,到3.6億銀人仔,靚仔到痹。金天零售店794家,有過半數喺三、四線城市、鎮。照咁睇,阿爺計劃城鎮化,提高三、四線地區經濟動力,加埋提高對農民工醫療扶助,金天地區零售業,食到應一應。而集團直供模式,直接攞貨,再銷售畀客戶,毛利亦啖啖肉。
金天今、明兩年,純利係咁意增長20%,連上市招股攤薄反映,預測PE分別得9.4倍及7.8倍。場內國藥控股(1099)及上海醫藥(2607)預測PE,全部15倍樓上。
金天呢期主攻藥品網上零售,已經攞到省級經營許可證。喺2012年,祖國醫藥網購達到16.6億銀人仔,年增幅高達4倍。但呢個數額,只係上年藥品銷售總規模0.7%。祖國藥品電子商務,前景爆炸。