【李華華Online】「白鞋蕭」引入佳寧娜大廚 餐廳開潮州菜
李華華
江湖人稱「白鞋蕭」嘅四叔御用收樓經紀蕭承忠,除咗為大孖沙度橋、拉生意之外,咁耐以黎仲搞過幾盤生意。幾年前佢同朋友就喺尖沙嘴開咗間餐廳叫「囍鍋」,但生意麻麻地,搞搞吓就得返白鞋蕭一個老闆撐住盤生意。白鞋蕭話三年來已經擺咗過千萬落間餐廳,希望之後可以扭虧為盈。
做過咁多瓣數,連呢位老江湖都慨嘆做飲食競爭激烈,獨沽一味就無法子將餐廳起死回生,一定要滿足到食客嘅幾個願望先有轉機。最初間舖就主打蒸鍋,之後就加入手工點心同粵菜,五月份開始就再提供埋潮州菜,要多管齊下吸引人幫趁咁話。
為咗呢個潮州部,白鞋蕭搵黎老字號佳寧娜嘅大廚胡俊偉同佢嘅班底黎幫手,全部都係熟手師傅。華華試過佢地嘅滷水拼盤、鵝片同炒麵,滷水入味、味道同刀工賣相都唔錯。祝佢呢個新嚐試能夠客似雲來喇。