舞台劇於香港一直不普及，近年大家對舞台劇認識多了，或多或少是因為詹瑞文，他將快樂元素注入舞台劇，吸引更多觀眾入場。當詹Sir決定慢慢轉戰幕後時，機會就落到兩位徒弟翟凱泰（泰臣）及楊詩敏（蝦頭）身上。早前的《潮性辦公室》泰臣及蝦頭的破格演出令人留下深刻印象，加上不少人將片段上載，令網友開始認識他們。不過在泰臣及與蝦頭走上潮性大道之前，他們與一眾舞台劇演員一樣「等了又等」，苦等了不知多少個年頭，才捱到出頭天。　撰文：李珮洳

翟凱泰及楊詩敏均畢業於香港演藝學院，蝦頭畢業後曾與不同的劇團合作，有很多演出機會，不過甚少做女主角，多是做一些二線角色，她曾問自己：「點解我唔可以做女主角呀？我係咪永遠都係做呢啲二線角色，係咪我有啲乜嘢問題呢？」

蝦頭：詹Sir淨係唔搵我

多年來蝦頭都未能「埋班」，最大的原因是香港的劇團少之又少，蝦頭浸淫多年後覺得去了一個樽頸位，希望尋求突破，此時她遇上了她的伯樂兼恩師詹瑞文，蝦頭說：「之前我啲演出詹Sir都有嚟睇，我見住佢陸陸續續搵我身邊啲partner合作，從來都冇搵過我。有一次我見到佢，主動同佢講自己想尋求改變，希望佢畀意見，當時佢答我『好呀！』我都半信半疑，佢會唔會搵我，隔咗幾日佢真係打畀我，仲叫我去佢公司傾，一傾就叫我加入佢個劇團。」
當時蝦頭沒有即時答應，過了一年她終於成為PIP（詹瑞文劇團）的演員，她說：「以前見住詹Sir搵晒我身邊啲朋友淨係唔搵我，我都唔好過，一定係覺得自己做得唔好啦！直至我主動提出搵佢，佢覺得一個演員知道自己有問題就想進步，於是佢就提出叫我加入，嗰一刻我開心到不得了。」

泰臣：做兒童劇係磨練

相比起蝦頭，泰臣比較幸運，畢業後詹Sir提出與他合作，及後加入PIP擔任導師，教小朋友演戲，多年來都是演出兒童劇，就正如周星馳做了多年《430穿梭機》一樣，沒有機會做大人嘢！泰臣默默等待一個機會，直至前年一齣《潮性辦公室》，令他與蝦頭齊齊「彈起」，開始為人認識。雖然泰臣看來發展平穩，原來他亦經歷過失業的日子，他說：「有邊個做舞台劇演員未試過冇錢嘅日子，我試過做一個劇有萬幾蚊，之後幾個月冇嘢做，嗰段日子咪喺屋企寫啲教劇嘅課程，又不停打畀同行問吓人哋有冇角色啱自己做囉。」
對於詹Sir的提攜，內向的泰臣只以一句「在心中」交代一切感謝的說話，他說：「佢睇嘢嘅目光係好遠大，叫我一直做兒童劇、教人做戲，其實係磨練我嘅演技，好多人都可能會覺得做正劇先係勁，不過兒童劇仲難做過正劇，因為小朋友嘅反應最直接，你做得唔好、掀動唔到佢嘅情緒，佢哋一係就去廁所，一係就同媽咪講要返屋企。我好自豪咁講，家我有一班小朋友fans，佢哋知道泰臣哥哥係邊個。」

放棄演戲人生無意義

至於蝦頭也面對不少考驗，早年沒有演出的時候便於演藝教暑期班，2000年她因為家中突變，成為家人的經濟支柱，為了生計她去應徵餐廳侍應，餐廳老闆一口拒絕，她說：「個老闆見我學歷高，唔信我會做嗰份工，覺得我係為咗做戲攞經驗。我同自己講，如果連夢想都放棄，人生仲有乜嘢意義呀？所以我繼續做落去，乜嘢劇都接，家收入唔錯o架。」
如今蝦頭和泰臣在舞台上站穩陣腳，他們感激詹Sir給他們上位的契機，但能否把握時機繼續在台上發光發熱就要靠自己的努力了！

楊詩敏

年齡：34歲
學歷：香港演藝學院獲榮譽學士（導演）及演藝深造文憑（表演）
演出作品：《愈笨愈開心》陳師奶、《潮性辦公室》乾女蘇小姐
創作作品：《一篤戲》之《奶神宿命6絕代金華火腿》
演出電影：《十分愛》、《我的最愛》、《戲王之王》
獎項：2006年香港舞台劇獎最佳喜劇女主角

翟凱泰

年齡：34歲
學歷：香港演藝學院
專長：形體動作及口技
演出作品：《潮性辦公室》托水輝哥、《o靚模襲地球》鬍鬚美少女
執導作品：兒童劇《小紅帽的藍色世界》

玩轉悶劇院

看蝦頭和泰臣注滿快樂因子的舞台劇，爆笑指數超乎想像，即使開場時觀眾正襟危坐，但在他們和拍檔出盡法寶帶動下，全場觀眾狂笑拍掌，快樂能量互相感染。

木村托水《潮性辦公室》
托水輝哥渾身是勁地表演插水—換蒸餾水，還來一招木村拓哉上身玩抹汗，笑爆全場。

雌雄莫辨《o靚模襲地球》
在o靚模狂攻之下，港男港女都不能逃出她們的特技整容及三級姿態影響，淪為奴隸。

互索調情《潮性辦公室》
女波士CK與下屬在辦公室互索香水味兼送金泳褲，凸顯上班族探索情感禁區的無奈。

粗腿無罪《一篤戲》
楊詩敏的處女「自作業」，《一篤戲》中狂晒絕代金華火腿為港女平反。