去年4月誕下兒子白迅（Dylan）嘅33歲黃婉君（Rosanne），前晚到中環出席活動，佢透過公關向記者講話有嘢宣佈，之後腳踏五吋高踭鞋嘅Rosanne見記者就刻意摸肚。問佢係唔係再度懷孕？佢開心話已懷孕兩個幾月，不過中國傳統未夠三個月怕BB小器係唔會講住，鬼妹仔性格嘅Rosanne話知道呢個禁忌：「係呀，大家都會祝福我，我個仔家19個月，一直都想追個女，係計劃之內。」被現場記者鬧佢大肚仲着高踭鞋時，佢話着埋今日就唔會再着。

同場仲有莊思敏、呂晶晶同傅嘉莉，對於近期嘅電視大戰，一早離開亞視嘅呂晶晶可說十分慶幸，佢話：「唔好咁講，我斷斷續續喺呢間公司都有成六年，都有留意呢啲新聞，家我喺內地拍劇。呢個行業有更多競爭最好，演員都想多啲電視台多啲機會，城電有傾過，但度唔到期，睇吓出年有冇機會合作。」
莊思敏早前返大馬出席胞弟婚禮，雖然胞弟嘅朋友質素好高，但個個都有女伴，搞到佢空手而回。莊思敏話媽咪順便喺保險箱攞啲嫁妝分畀幾姊妹，佢仲即刻展示手上戴嘅金鈪，原本馮仁昭以為身為拿督女當然會有超勁金器，點知佢手上嘅金鈪係幼得驚人。
撰文：馮仁昭