當年今日
關於我們

【感激老婆】黃秋生自認不是好爸爸 樂做兒子身份無恥一世

蘋果日報 2019/12/07 06:01

黃秋生爸爸父子william

黃秋生跟正印老婆吳惠貞92年結婚,育有兩子黃睿名和黃煜政,早年出軌撻着岑建勳外甥女Joyce,兩人十年地下情,生下兒子William,母子其後移居英國生活,Joyce亦已婚另組家庭,秋生多年來未有辜負舊愛及囝囝,一直照顧他們的生活。
秋生的童年未有父親陪伴長大,媽咪母兼父職把秋生湊大,秋生去年越洋尋親,遺憾找到的只是亡父的資料,但多了同父異母的一對孖生哥哥。沒有爸爸的半生,但現實生活中,秋生也沒騰出很多時間陪伴三子成長,但他總會適當時候「蒲頭」,秋生說:「佢哋唔使老竇陪成長,我咁鬼惡,佢哋需要我時喺度就得,父親係……背影嚟,睇阿爸面目太清楚冇用㗎。」
口硬心軟的秋生跟三子關係疏離總是恰到好處,「有時通吓電話,大仔有時煮咗碟餸影張相傳我,我讚佢兩句。有時我『鬥』完封英文信,又會佢改兩隻字,畫龍點睛,大仔真係冇得頂喇。細仔William懵懵哋,鍾意周圍走,佢話鍾意耕田,要去阿拉斯加耕田。」秋生直認給予三子很大自由度:「係㗎,生佢出嚟,唔通屬於你咩?財產嚟咩。」秋生可是有求必應爹哋?他答:「佢哋要問阿媽先,我負責經濟,睇佢哋情況要咩。佢哋都20幾歲喇,如果仲有問題,咁呢個唔係佢嘅問題,係你嘅問題,你搞出嚟,你搞得好,佢哋唔會有問題。搞唔好先有問題,佢哋咁大個仔,人格都形成咗,佢哋只會向自己方向去,既然形成咗都唔關你事。」
秋生表示近年跟兒子關係佷好,「以前我話佢哋唔叫人,佢哋話以為我係朋友,我答佢哋,你會唔會俾朋友供書教學十幾、二十年,仲畀埋屋佢哋住,大仔咁就收檔。」秋生可算是「虎爸」?他說:「我惡唔惡對仔女,我唔知,我冇審視自己,當然有啲時候會做錯嘢,講錯嘢,但講錯咗咪喺當中學習,人總會有錯,人唔係一隻馬,唔係生出嚟就識跑,學行路時都會仆崩鼻。」秋生明白少年會有反叛期,但他慶幸囝囝都非常生性:「我人生最掂呢樣嘢,佢哋好生性,唔錯,我都要多謝老婆教得好,佢對囝囝又補習又煲藥,我就長期喺外面賺錢,要多謝,唔係奉旨。」
問秋生覺得自己是一位好爸爸嗎?他說:「我唔係好爸爸,我只係一個好人啫。」那會是好兒子嗎?他又說:「做仔好,唔使煩,乜都阿媽搞晒,發脾氣又得,點都得,我都無恥咗一世。」或許兒子是母親的前世情人,份外得寵,秋生認同:「都可能係。」秋生又覺自己可算一位好老公嗎?他即說:「好得人驚,到而家都唔知點做一個好老公,基本上我係一個好反對婚姻嘅人,我唔知點去做好老公,答唔到你,我根本反對嗰樣嘢,問我『混吉』。」
三個兒子中,誰最似秋生?「一人一啲,三合一拆開,個個都有啲,大仔似而家嘅我好冷靜,佢鍾意煮餸,佢好主觀,巴之閉做大佬,佢情緒脾氣大,冷靜唔好表露出嚟,佢心地好,好肯幫人。二仔就似我儍,輕信人,好天真,佢仲係好模糊,冇方向感,唔知自己想點,我唔會導航佢,要佢自己搵方向。細仔William好gentle,呢樣我唔及佢,佢斯文到英國佬咁,好有探索精神,鍾意大自然,一個人周圍走,可以獨自去冰天雪地過幾日。」秋生可想子女繼承衣缽?他即說:「我有乜衣缽?我冇衣冇缽,勁過六祖,我裸聊。」
撰文:比華利
攝影:陳俊強
攝錄:林德雄、葉君海
場地:演藝學院
-----------------------------
《2019高級珠寶鑑賞誌》
點擊即睇過百款鑽飾名錶
-----------------------------
【匿名港警爆大鑊】
韓國KBS時事節目《時事直擊:香港 被自殺》
一按即睇
empty
秋生自問不是好爸爸和好老公。
empty
秋生給三名兒子很大自由度。
empty
秋生的生父當年拋棄了他兩母子,所以秋生一直跟母親相依為命。 (資料圖片)
empty
秋生表示最鍾意做媽咪兒子的身份。 (資料圖片)
empty
秋生指幼子William有探索精神 。 (資料圖片)
empty
秋生大讚長子心地好,樂於助人 。 (資料圖片)
empty
秋生感激太太為他教育好兩名兒子。 (資料圖片)
empty
秋生(中)無緣跟生父重聚,反而在尋父過程與同父異母的兩位哥哥相認 。 (資料圖片)