今日中銀紀念鈔首日領鈔，惟即告炒燶。有香港炒家表示，今早在會展外以400元收單張及1,100元收三連鈔。但十分鐘後回收價突然插水，跌穿發售價。單張及三連鈔分別急跌至230元（發售價288元）及800元（發售價988元），30連鈔更遭大部分炒家拒收，有成交錄得低至8,000元（發售價13,888元），該位賣家需慘蝕約5,000元，直言:「chok過恒指」。內地多位炒家更以蝕本價將較早前回收到的紀念鈔全部放予另一位香港炒家後離場，令原本擁擠的回收人龍大減。

截至下午二時，全場回收紀念鈔最多的錢幣商香港真藏（荃灣）負責人張頌昇表示，現時收單張及三連鈔開價分別約230元及800元，拒收30連鈔。他表示，在8月時已預料今次中銀紀念鈔會炒燶，因此公開呼籲大眾不要炒30連鈔，但可以抽單張及三連鈔博尾數為「88」及「888」的「靚冧巴」。

本報記者現場所見，有「4」及「7」兩個號碼的紀念鈔普遍遭到拒收，有市民手持尾數為「88」的三連鈔予張頌昇問價。張頌昇開價1100元，因為3張紀念鈔中有一張頭2個號碼為「34」，有一個4字，若沒有4字張氏則表示會開價1500元。惟最後該位市民未有放售予張氏就離去。

九龍集郵中心姓蔡負責人指出，有市民陸續領鈔，但現時回收價遠較發行價為低，單鈔原價是300元，但該中心回收價為200元至250元，當中有炒家攜逾百張單鈔蝕賣，而該群人士據悉為香港人。

至於原價988元的3連鈔，在下午約2時仍能以1,000元價格回收，「但好快冇架喇，今日第一日之嘛，之後貨會愈來愈多，轉個頭就破底。」

至於原價13,888元的30連鈔，實為今次紀念紗的重災區，蔡生以10,000大元即能接收，即炒家慘蝕3,888元，「我真係用10,000蚊收到架，賣嗰個梗係唔開心啦，第一日供應唔多已經趕住蝕放套現，同埋拎個日期冇彈性，之後個啲先慘啊，好似幫中銀打緊工。」

成功抽中30連張中銀紀念鈔的黃太表示抽中不高興，「梗係唔開心啦，開乜嘢心，行九里遠仲慘過去長城，拎嗰啲咁嘅嘢...初頭編排又唔好，話唔拎就捐去公益金，邊有咁樣，後尾搞返押後有得補拎，搞到而家去旅行都冇得去，又唔夠膽去！」

黃太一家四口抽中銀紀念鈔，只有她抽到30連張，打算將30連張原價讓給朋友，自己不要，「唔賺呀，大把呀，炒喎，實炒燶啦，上次啲100連張，邊有人愛呀，紀念鈔，不如紀念自己父母好過啦。」

記者：彭崇強

蘋果財經，關心你飯碗
http://fb.com/appledailyatm