韓國女神全智賢早前喺宣傳新片《復國者聯盟》期間，突然宣佈陀B十周，令眾劇迷都喜出望外。

而BB認真腳頭好，未出世就已經帶挈女神新片票房一日好過一日。《復國者聯盟》喺上周三上映當日已累計咗高達49萬入場人次，期後上映3日入場人次就已經突破100萬，一日就後再突破200萬入場人次，成為韓國周末票房冠軍。

到o依家套戲上映咗接近一個星期，入次人次就已經有超過379萬，過埋今日相信極有機會突破400萬大關。

而就咁睇2015年上半年韓國本土電影嘅成績，由男星李玹雨、金武烈等主演嘅韓片《延坪海戰》由6月24日上映至今，5周入面就累積咗595萬名入場人次，暫時企穩韓國今年最賣座嘅一部本土電影嘅位置。

不過《復國者聯盟》喺上映一周就已經累計接近400萬入場人次，睇嚟唔使5個星期，《復國者聯盟》就有望衝破《延坪海戰》595萬名入場人次嘅紀錄，成為今年韓國最賣座嘅本土電影。

BB咁好運，難怪之前女神都講明生完之後都唔會息影喇。