【提名多咗工作】推出新歌試水溫 寶珮如:希望接受我嘅歌
最佳女配角藍天白雲寶珮如
歌手出身嘅前亞視藝人寶珮如,1989年出過黑膠碟後轉型做藝人,99年因為發生嚴重車禍而毀容,結果演藝事業受到影響,康復後只係喺電視劇或電影客串未有全面復出,直到最近佢憑電影嘅《藍天白雲》入圍金像獎最佳女配角,令大家又重新關注。
今日寶珮如去咗新城電台訪問宣傳推出歌曲《寶貝》,內容講人生經歷,仲會拍MV,寶珮如話自從1989年出過黑膠碟至今相隔30年,本來已經將歌唱事業放下,不過難得有呢個機會,所以都想藉住呢首歌乘機試吓水溫,睇下觀眾接受程度。
講到入圍金像獎最佳女配角,寶珮如話自己睇咗《29+1》、《明月幾時有》、 《黃金花》,寶珮如話:「心目中睇好欣宜同葉德嫻,我對自己就真係冇信心,不過咁耐冇出嚟原來都仲有觀眾支持,呢樣嘢係開心過被提名,所以有提名就當攞獎。自從獲提名之後都多咗好多工作搵我,其中一個係去馬來西亞拍劇同陳國邦合作,但我遲啲要飛去澳洲做一啲教會事。」
寶珮如仲話:「我已經ready復出演藝工作,最希望係有人接受我嘅歌,想帶畀人知人生係有好多希望。」
精選娛聞,喺晒《娛果》
http://fb.com/appledailyent