韓國七人男團防彈少年團（BTS）將於下月29日嚟香港亞博館開騷，日前佢哋喺韓國接受訪問。

BTS首次嚟香港開騷，問到佢哋最想喺香港做乜嘢時？RapMonster、Suga同Jungkook就表現得最為食，佢哋話知道香港係環球美食之都，最期待就係想食晒所有香港街頭美食，Suga仲話最想食魚蛋。

Jungkook就話嚟到香港最想同「宇宙最強」嘅甄子丹學詠春，又話：「甄子丹係我偶像，佢真係很帥！」Jimin原來亦都想挑戰演戲，V同Jungkook都話：「如果有機會真係想參演香港嘅武術電影，一定會盡力做到最好！」

BTS去年有現身MAMA頒獎典禮，佢哋大讚香港粉絲好熱情，Suga話：「特別係粉絲們畀我哋嘅愛，令我不禁想應該一早就嚟香港開騷。」

由於BTS全隊成員都好年輕，有部份成員都未足25歲，所以佢哋想趁年輕同成員一齊去旅行，而原來佢哋組成BTS之前大家都唔認識對方，後來先加入BTS嘅V就話未加入前覺得BTS係一隊好帥嘅組合，但其他成員似乎對V有特別嘅深刻印象，Jin同Suga就大笑佢入隊時嘅皮膚真係好黑，又寸佢話：「你今日係唔係着咗啡色絲襪？」不過RapMonster就安慰V話佢加入咗之後BTS先有進步。

而現時BTS亦都展開咗一齊宿舍生活，令隊員之間嘅感情有增無減，不過佢哋就投訴宿舍有好多蚊，Jin無奈話：「呢次係我出生以嚟第一次見到咁多蚊嘅屋，簡直係地獄。」Suga仲誇張話：「根本就係蚊子孵化場！」

由於佢哋出道日子尚淺，問到佢哋有咩令到人記得時，J-Hope就即刻用中文介紹自己：「希望哥」。Jimin稱自己做「ChimChim」，RapMonster話自己係「RapMon，簡單易記！」Jungkook就覺得佢本身嘅名好啲，Jin就話大家可以叫佢做「帥人」，Suga同V分別用廣東話介入自己係「閔Suga天才」同「V最型」。佢哋亦好好學，即時學咗幾句廣東話如「靚女」同「我愛你」等，希望到時嚟到香港後同粉絲講。