「六嬸」方逸華昨午因病安詳離世，享年83歲(新聞連結： http://bit.ly/2BdCvv5 )。方逸華在50、60年代做歌星時期，跟顧媚及潘迪華感情要好，尤其是顧媚，六嬸不但向六叔提出幫助顧媚弟弟顧嘉煇到美國進修音樂，更與顧媚不時陪六叔到大陸遊山玩水，顧媚離婚後，六嬸安排她入住邵氏宿舍，又將宿舍一間房打通成為大畫室給顧媚畫畫，情同姊妹，早年雙方因為小誤會而感情轉淡，除顧媚外，劉家昌、甄珍、向華強太太陳嵐和張玉珊也是六嬸閨蜜。

現時身在溫哥華的顧媚，今早接受《蘋果》訪問，才得知舊友離世的消息，剛起身聽到這個消息，感到難過：「除咗喺電腦睇新聞之外，我唔知道消息，多謝你通知我，好突然，直情呆咗，我對上一次返香港都三年前，呢段時間都冇返去，冇見到佢，返香港嗰時有見過，嗰次見係顧嘉煇獲中大頒榮譽博士學位，方逸華都有去，冇一齊出席咩場合，只係食咗餐飯，以前都會通吓電話，近年大家都冇咩聯絡，因為佢越嚟越忙，自從阿sir(邵逸夫)走咗之後。」

方逸華早年當歌女，後來成為商界女強人，她一直未有與舊時歌友聯絡，唯一仍會見面就是好友顧媚，顧媚解釋：「係呀!佢同顧嘉煇聯絡仲多啲，因為佢對佢哋有恩，我哋係好朋友嚟，唔當大家係同事。」

問到外界經常指方小姐「孤寒」，顧媚說：「佢一啲都唔孤寒，有時我仲覺得佢好闊佬，對朋友好有義氣，我離咗婚之後，佢又俾我住喺邵氏，住咗11年，好唔話得，佢喺我心裡面，太多嘢要講，一時之間講唔出咁多，呢個消息太突然，估邊個都估唔到係佢。」

「我突然之間聽到呢個消息，都唔知點講，個腦都未定，當時好大感觸，因為佢係我最舊嘅朋友，最耐係佢，1950年左右就識，識咗60幾年，而且我喺邵氏住過十年，關係好深。」

顧媚又指自己寫過一本自傳，大家有好多開心的日子，當中有提到方逸華，顧媚回想道：「佢(方逸華)都有啲唔高興，不過我講實話之嘛，我講大家咁耐朋友，我講玩笑，佢又嬲我嗰啲，佢係對我哋好好，佢對我哋兩姊弟真係好好。」

顧媚指胞弟顧嘉煇明年1月會返香港，自己未必會回港，稍後要聯絡煇哥，因為阿煇目前在溫哥華，她慨嘆當年方逸華喜歡在邵氏唱卡拉OK，又會開party一齊玩，顧媚表示方逸華有自己一個舞廳。說到顧媚近況，她指現時身體未太好，之後要種牙。