蔡瀚億（BabyJohn）今日去到商台為其首次擔正嘅電影《救殭清道夫》宣傳。

今次BabyJohn喺戲中同錢小豪一齊打殭屍，佢話：「自己第1次拍動作戲，打到周身傷，開始拍時都驚打親人，好彩小豪綵排時教我打，拍打戲真係難過跳舞，又要吊威吔，每次拍都整到下面好痛，好在冇受傷。」BabyJohn話劇組安排咗1位武指貼身照顧，兼幫佢佩戴安全帶，BabyJohn話：「每次整完安全帶，確定下面唔痛，但係拍嘅時候點都整到痛，唯有忍痛快快拍完。」

BabyJohn早前忙拍劇，忙到冇時間見老婆，佢話：「我以為情人節都返唔到屋企，老婆有問過邊日返到屋企。」BabyJohn話幸好冇影響夫妻感情，而且老婆仲不時準備湯水俾佢，感覺窩心。