西甲「銀河艦隊」皇馬解散船隊後，改走年輕路線下竟慘變幼稚園，最近仲發生比比同巴布亞打交事件。於是，球會打算請位心理輔導員加盟，幫班細路仔做心理輔導，實行夜晚瞓唔着時減壓、暴力躁火時降火，從而提高球隊嘅戰鬥力。
呢位心理輔導員名叫史柏文（Spackman），同漫畫人物Spiderman蜘蛛俠個名咁似，就知係猛人嚟啦！呢位新西蘭人之前幫開F1天才車手咸姆頓做心理輔導，結果後者第一年玩F1啫，就幾乎贏到全年總冠軍，認真犀利！

後生仔心火盛

皇馬今次咁醒目搵啱人，原來全靠體能教練廸沙禾。呢位意大利人同史柏文喺曼聯共事過，於是見球員呢排相處唔多融洽，咪推薦史柏文囉！廸沙禾亦提供咗個「問題學生」名單，包括比比、史奈達、希古恩、加高、羅賓奴、洛賓同德倫特等人。
我求大俠好贊成皇馬請史柏文做心理輔導，因為老大哥魯爾同古廸等上樑不正，成日搞搞震，教練蘇斯達後生嗰陣壞到全球壇都出晒名，而且佢一向對有天份嘅年輕球員採取縱容政策；久而久之，皇馬班年輕人承受爭位、博表現嘅巨大壓力之下，特別容易發𤷪𤺧。
如果一切順利嘅話，史柏文最快喺出年1月就可以上任。到時皇馬球星肯定個個變晒正義嘅蜘蛛俠，一諗起比賽就雙眼有火，隊友朝夕相對卻係和顏悅色，到時聯賽同歐聯肯定手到拿來啫！