顏卓靈同鄭中基主演嘅電影《大樂師．為愛配樂》連日贏盡口碑，同時落力呼籲加開場次，院線雖已有配合，但佢仲希望加開多啲場次，等觀眾可以欣賞到佢哋呢套誠意之作。

顏卓靈大前晚現身將軍澳一間戲院再為《大樂師》謝票，期間撞到C AllStar嘅成員陳健安（安仔）偷偷捧場，其實另一成員釗峰噚日都有喺Instagram聲援：「文戲的鄭中基，跟他的歌聲一樣吸引。不是太多人提及，但個人相當欣賞這部電影的美指，漁排的每個細節很讚拍過這部電影，係咪已經終身免疫暈船浪？。」顏卓靈跟住互動留言：「多謝釗峰，以後唔會暈船浪。」

《大樂師》大部份場景喺漁排取景，顏卓靈仲話：「完全係美術總監陳七嘅功勞，佢嘅美術team同道具手足，一塊木一口釘，喺西貢對出海中央，由零開始砌出嚟！就算暈浪，仲有所有工作人員陪大力妹妹一齊捱，成品咁靚，幾暈都值得。」

本月30號復活節一連四日公眾假期，據知係冇港片上映，希望到時觀眾仍有機會入場睇到《大樂師》。顏卓靈全心全意為《大樂師》瞓身宣傳，但場次太少令票房低，佢早前接受網上訪問，佢都好感慨呻點解冇人嚟睇部戲，仲自嘲係咪拍咗套爛片，《大樂師》截至噚日，上映16日僅收65萬票房，睇番呢一套港片每日平均都有七、八場上映。

精選娛聞，喺晒《娛果》
http://fb.com/appledailyent