賽事去到3月份，今次已係季內第52次賽事，成績仲落緊單嘅馬房唔使問都知一定心急，榜尾三子賀賢、麥菲文、告達理同係七Win，當中前者有21個亞軍都算失運！

至於大告係包尾一個必然最緊張，之但係基於兵源唔夠，部署一定要更加小心，一Win一Q都不能錯過。今次（3日）大告雖然出馬少，但第六場「神威敖翔」應該可以幫到手。

「神威敖翔」上季初81分輸過俾「旌暉」入Q，跟住落到76分贏馬，今季78分起步，減到目前59分可跑四班，唔相信一匹六歲馬會退化得咁快，如冇估錯只係刻意部署，今次有十足能力打低抽13檔的「精算閃擊」，從而一落班即贏。

另外，麥菲文首季開倉，冇理由就贏唔夠數咁差。今次尾場「佳知武仕」上仗谷草1200米潘頓「了吓了吓」只輸個零身位，好明顯係路短求熱身，有咁好走勢亦反映馬匹本身能力唔差，今次轉去加程跑來港前贏過嘅1400米，機會來了！