呢個政府漠視民意、我行我素嘅程度，好多建制派想撐都撐唔落。立法會批發及零售界議員邵家輝一向係反對禁止電子煙同加熱煙嘅舵手，佢今日喺立法會都毫不留情，對住選擇性引用數據嘅食衞局同衞生署官員，忍唔住爆粗大罵「X你點解讀啲又唔讀啲嘅呢﹖你（淨係）讀啲對你啱嘅嘢，你真係，好奇怪！」

話說食衞局今日喺一個法案委員會上，堅持要全面禁止電子煙同加熱煙製造同進口，並且引用包括美國食品藥物管理局（FDA）等報告，例如話加熱煙可能含有未知毒性嘅化學成份，所以唔代表危害會細過傳統香煙。

一直揸住份文件睇嘅邵家輝隨即質問，究竟毒性成份係咩名？含量幾多會對人體有害？衞生署控煙酒辦公室主管封螢就話，報告搵到嘅化學成份喺傳統煙搵唔到，含有基因毒性同細胞毒性。

呢個時候邵家輝突然嚟料，先質問「『但含量非常低』你唔讀埋呢幾個字？」封螢就辯稱只係答有咩成份，唔係講含量幾多。邵家輝梗係火起，即刻罵「我exactly揸住份嘢讀，你讀緊『雖然含有基因毒性及細胞，但含量非常低』吖嘛，X你你點解讀啲又唔讀啲嘅呢？你（淨係）讀啲對你啱嘅嘢，你真係，好奇怪！啲市民睇唔到呢份嘢，我哋睇到吖嘛！」

封螢之後繼續帶佢遊花園，話因為係化學物質，臚列啲名出嚟意義不大，已經「慶烚烚」嘅邵家輝繼續喪罵政府混淆視聽、誤導公眾，仲借機一次過罵晒政府同警察，「等於第一日啲人走嚟立法會扑玻璃，扑玻璃嗰啲係暴徒，後面啲係和平示威者，你唔能夠將佢哋捆綁埋，話成個立法會都係暴動，咁啲人梗係暴動啦，係咪？」

睇見邵家輝咁勇武，政府代表只能支吾以對，但八方認為唔可以繼續扮傻，因為委員會主席郭偉強講明，呢個法案委員會有排玩，過唔過到都好大疑問，食衞局真係要睇路。

-----------------------------
【民陣國際人權日遊行】
日期：12月8日
時間：下午3時
地點：維園至中環遮打道
主題：守護香港．和你同行
＊不反對通知書申請中
-----------------------------
2019區選專頁
光復香港 11.24踢走共產黨
-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇
-----------------------------
無懼警暴 學懂自救
《抗暴之戰●法例須知》讀果 上架
-----------------------------
【撐學生】
召集有心人 撐學生全年睇《蘋果》
立即按此