韓國女團KARA嘅27歲前成員具荷拉，上周因涉嫌毆打27歲髮型師男友A某而驚動到警方。A某報警時稱遭具荷拉毆打，不過具荷拉當時向警方表示，係A某醉酒後偷偷潛入自己屋企並率先踢佢，之後雙方有肢體衝突。

日前A某接受韓媒《朝鮮日報》訪問時，強調冇出手打過女方，又公開額頭、眼下、鼻旁三道超過3厘米嘅傷痕。隨後具荷拉向韓媒《Dispatch》公開自己受傷嘅照片，表示係雙方都有出手打對方。

對於具荷拉鬧出涉打男友嘅新聞，唔少網民都力撐具荷拉，認為係A某講大話，冇可能冇出手打過具荷拉。尤其當具荷拉公開受傷照片後，網民都認為根本係具荷拉一直捱打，就算有抓傷對方，都似係正當防衛，留言「明明係具荷拉傷勢更嚴重」、「具荷拉應該係捱打，而且子宮出血嘅診斷書係真嘅」、「男方根本係想害死具荷拉」、「心痛具荷拉」等。

精選韓流，喺晒《娛果》
http://fb.com/appledailyent