當年今日
關於我們

【追蹤96小時】《造星》大熱姜濤決賽前爆汗狂操 冇女陪日日喪玩電話

蘋果日報 2018/10/09 00:00

運動全民造星姜濤狗仔出更

ViuTV搞咗足足4個幾月嘅選秀節目《Good Night Show全民造星》,將於嚟緊星期日晚(14日)喺九龍灣展貿中心舉行決賽,喺最後10強中選出一位男神,獨得100萬現金獎。
現年19歲自爆仍然係處男嘅姜濤,雖然被睇好成為頂頭大熱,但佢未敢掉以輕心,始終觀眾投票佔50%之外,仲要睇埋決賽當日表現,所以姜濤除咗為節目拍攝同排練之外,佢一有時間就運動狂操。
日前《蘋果》記者連續追蹤咗姜濤4日,自稱冇拖拍嘅佢未見有囡囡相伴,而其中兩日姜濤都係去跑步同去公園做運動,為決賽做好準備。不過,由於近日太多人認得出佢,姜濤出街搭港鐵都戴住口罩,就連喺便利店食件三文治,都係速食速戴番個口罩,真係相當小心。
上月25日約黃昏6點,着住長衫長褲嘅姜濤,離開九展ViuTV新office,見佢個樣都好攰咁,佢唔等九展嘅shuttle bus就急急截的士去九龍灣德福廣場再轉搭港鐵,並且一落港鐵就即刻戴番口罩免被人認出。姜濤返到銅鑼灣屋企之後,急急換咗短袖衫同短褲戴住headphone落街跑步,完全冇熱身就喪跑去灣仔北方向。
到咗第二日,姜濤一早外出,直至下午4點先至戴住口罩返屋企。大概10分鐘後,姜濤就戴住口罩落樓,行嚟行去漫無目的咁玩電話,最後姜濤行去屋企附近一間便利店,玩完一輪電話之後,就買咗件三文治醫肚,原本戴住口罩嘅佢,拉低口罩之後就好肚餓咁狼吞虎嚥,唔駛30秒就KO咗份三文治,見佢食完即刻拉番口罩繼續玩電話,玩咗半粒鐘先至行去銅鑼灣世貿中心寫字樓。
9月27日下午2點,姜濤一身韓仔打扮落街搭港鐵,街上唔少擺街檔嘅寬頻sales都認得佢,其中一個仲好大聲話:「嘩,姜濤呀。點解成日喺銅鑼灣呢個位見到佢嘅?」跟住姜濤搭港鐵返九龍灣ViuTV,可能呢日見港鐵唔算人多,所以姜濤冇戴口罩,但就繼續佢平日指定動作,就係dup低頭玩電話,一路玩到九龍灣站,然後搭的士返ViuTV。
到第四日,姜濤又再出外運動健身,一身運動裝嘅佢跑去加寧街銅鑼灣花園。點知一去到公園,佢又係玩電話,玩咗一輪先捨得放低電話開始做運動。見姜濤又深蹲又掌上壓又跳又原地跑,做完又拉吓筋,但對眼都不時望實個電話,好似等緊個好重要電話咁。做咗半個鐘運動之後,姜濤已經爆汗,熱到佢要捲起衫袖。冇幾耐,有對情侶入花園談心,由於姜濤冇戴口罩,對情侶好快認得佢,不時喺度指指點點,姜濤為免尷尬,於是雞咁腳攞返銀包同電話返屋企。睇番呢幾日姜濤嘅處男生活,發現佢冇女朋友唔緊要,最緊要係有得玩電話!
精選娛聞,喺晒《娛果》
http://fb.com/appledailyent