馮仁昭四圍超:
人氣女星忘記負心醜男專心服侍老闆
其貌不揚嘅男歌星就出晒名風流,之不過佢呢兩年發展都算唔錯,但係感情生活就幾混亂,原本佢都有個紅歌星女友,只可惜佢唔識珍惜,令對方一次又一次死心,結果就梗係分手收場啦。不過男歌星之前喺寶島都傷得一位女歌星好慘,呢位女歌星喺寶島唱歌發展唔係咁掂,後來俾一位電影公司老闆睇中,力捧佢上位,𠵱家呢位女藝人歌影兩忙,都算吐氣揚眉。
新歡治情傷
女歌星偶然都會碰番呢位負心舊情人,但佢都幾大方,冇怪過佢,因明知男歌星咁多情,分手係遲早嘅事,再加上女歌星已經有咗新戀情,佢個老細男友對佢都唔錯,以前啲唔開心就一早忘記晒喇!
陳文媛怕色魔要人陪
陳文媛(BoBo)噚日出席喺港台舉行嘅《執法群英I》祝捷記者會,港台同時揭曉「十大哄動案件選舉」結果,BoBo話最記得就係屯門色魔同HelloKitty藏頭案,佢話:「我覺得女仔都係要特別小心,收工都會叫啲男同事陪我去攞車,安全啲嘛。」不如叫佢個緋聞男友陳冠希接送,咪唔使怕囉。
周杰倫難過李小龍癮
周杰倫好鍾意李小龍,佢曾經講過可以唔收錢演電影《李小龍傳》,但日前有報道指李小龍個女李香凝覺得周杰倫形象花弗唔適合,周杰倫所屬唱片公司總經理楊峻榮噚日話:「我們只有時間演《頭文字D》。」睇嚟周杰倫暫時只可以喺演唱會上扮吓李小龍滿足一吓自己!
張燊悅重人氣唔要錢
張燊悅噚日出席港台活動,佢話自從同倪震做咗商台節目之後,令佢損失咗六位數字嘅外快,佢話:「咁我差唔多晚晚都要做節目,有好多人搵我登台拍劇,都要推咗,咁冇話值唔值得嘅,有啲人去咗內地拍劇搞到人氣暴跌,我就寧願保持人氣。」但係佢做呢個節目都唔見得人氣好咗好多,不如搵下錢好過啦。
范曉萱結束五年情?
范曉萱同男友周俊偉盛傳分手,記者噚日打電話畀周俊偉,佢用國語話:「我沒有必要把私人的事跟大家講,媒體愛怎麼講就怎麼講,我不會去理會和回應的。」周俊偉唔肯正面回應分手事件,希望呢段情重有得救啦,話晒佢哋一齊都五年啦!
嘉碧儀勤學中文助拍劇
嘉碧儀噚日返咗將軍澳電視廣播城拍新劇《我師父係黃飛鴻》,見佢喺度狂咪劇本,原來嘉碧儀已經唔使再用拼音繙譯成英文咁睇,佢話:「我拍完《青出於藍》後都識睇咗好多中文字,不過我多數都係有邊讀邊,有字讀字咁,以前大學都讀過兩年國語㗎,𠵱家都睇多好多報紙學中文。」嘉碧儀咁勤力肯學,無綫應該畀多啲機會呢啲年輕人啦!
馬清揚怕囡囡變欣宜
熱愛賽車嘅大生銀行家族成員馬清揚,喺本月初成為澳門舉行嘅「第一屆新鴻基金融集團香港車會路車錦標賽」冠軍,噚日有關方面舉行頒獎儀式。被問到太太同女兒嘅近況,佢就話:「太太已經完全收晒身,個女𠵱家十四磅,好易湊,但係醫生就話佢係超磅BB,要減肥。」問佢驚唔驚個女肥到好似欣宜咁?佢聽到之後即刻話:「如果係就大鑊啦!」