三間大學噚日公佈支持同反對政改嘅最新滾動民調，為反對袋住先嘅泛民主派打咗支強心針，事關喺政改方案4月底出爐以來，首次打成平手，而且嚟緊仲有一個星期，話唔定喺京官露出原形，講明袋住先幾乎等同袋一世情況下，反對政改嘅人會多過支持，出現「死亡交叉」，難怪唔少泛民中人蓮子蓉咁口。
但喺泛民笑騎騎之際，有啲金融界中人士卻未見歡容，但似乎唔係純粹因為政改過唔到、冇得投票選特首咁簡單，而係佢哋預計到，若果政改一旦被否決，香港前景冇咁明朗，港股喺一段時間內，就唔會再有急升喎。

跌市氣氛短時間維持

佢以噚日為例話，君不見港股已經跌緊咩？乜大家無留意，當中唔少係地產股？而啲地產界大佬，連日咪預告咗，如果政改通過，港股就會上升咩？佢仲話今日都唔係焦點，要留意嘅係17號或18號嘅股市，因為政改預料呢兩日表決，相信屆時仲有得跌。
花生友當然代啲小股民問吓呢位財經界中人，呢個政改過唔到後嘅港股跌市浪潮，係咪會維持好長時間？使唔使做足應變措施？呢位財金界高人就話，咁又唔使太擔心嘅，預告呢啲氣氛都係維持一個短時間，旨在證明吓阿爺講緊嘅政改唔通過，會對社會有影響箒，佢仲笑笑口話，「最重要問題係，其實對阿爺嚟講，香港政改算係乜？」莫非暗示，根本毋須為政改造市？

花生友