陳法蓉今晚以「慧妍雅集」會長身份，喺尖沙嘴文化中心出席「甘肅水源慈善攝影籌款展覽2015」，陳法蓉嘅爸爸都有一齊嚟，佢就話上年同今年爸爸都有同佢去做慈善探訪，去到甘肅親身體驗當地人嘅生活，因為當地人要行兩個鐘頭先可以去到水源，佢仲話：「村入入面嘅年輕人都出咗去做嘢，所以得番啲小朋友同老人家，佢哋攞水都好辛苦。」佢話爸爸雖然80歲，但身體仲好過佢：「有時大車換細車，要行好多路，我都覺得攰，但爸爸都冇問題。」

講到噚晚嘅港姐選舉三甲，陳法蓉就話估中咗1、4、9號，佢話：「一號從來都冇變過，我喺朋友之中成為有眼光之人。」問到覺唔覺得今年嘅港姐好似變咗綜藝節目咁，佢就話：「呢個係時代嘅進步，娛樂性好豐富，放咗好多時間喺才藝表演上面，有啲才藝表演好精彩，有啲就有一種『咁就係才藝喇？』嘅感覺。」

陳法蓉又講到當年自己選嘅時候，有人教佢無論去到邊，都要望住個鏡頭：「可能依家年代唔同，所以依家只係行的話，大家會覺得唔夠精彩。」佢又話都有同成班朋友一齊睇，大家都係覺得一號係大熱，點都係三甲之一。