要數香港傳媒大亨，邵爵士實在當之無愧。曾幾何時，佢又有片場又有院線，公仔箱出現之後佢嘅台仍然係香港慣性收視之首，可以大膽講句，有好幾代香港人嘅娛樂同資訊差唔多全部由邵爵士一手提供。
以前香港人只得一大一細兩個電視台，所以佔領導地位嘅無綫喺股市嘅地位同公用股無乜分別。九十年代開始有衞星電視，不過內容唔夠地道，所以亦當無真正動搖過無綫龍頭一哥地位，甚至到咗有線嘅出現，無綫都仍然企硬。
噚日新電視宣布，將部份頻道開放畀電盈既Now轉播。利世民認為呢個係一個非常之圓滿嘅雙贏方案，無綫最大優勢係手上嘅劇集同節目製作嘅經驗，而Now就主力將機頂盒送入屋。呢個就係亞當史密夫教落：市場精要所在，合作是也！

消費者最終得益

時代會變，生意手段都一直在變，互聯網出現將傳媒嘅形勢完全改變。科技發展令到以前好多無可能嘅夢想，今日都通通變成小兒科。早幾年當互聯網啱啱出現，世人以為一窩蜂起網站就等於有網上策略。殊不知問題其實比起做網站複雜得多。對傳媒最大衝擊嘅，唔單止係互聯網，而係整個行業發展路向都改變咗，變通只不過係遲早嘅事。
以前嗰種包辦片場、製片同戲院嘅一條龍模式已經行唔通。傳媒老闆都要問一個問題︰究竟公司要做內容（ContentCreation）定係做分發（Distribution）？好似TVB選擇做內容，而Now就專攻入屋係做分發。其實對TVB嚟講，以前嘅對手係本地製作，𠵱家就要同全世界競爭，得益嘅始終係消費者。
TVB同Now合作只不過係整個傳媒整合嘅頭炮。究竟其他收費電視會點出招應變呢？其他傳媒亦都好難繼續單打獨鬥。究竟會唔會有更加多連橫合縱呢？相信好戲還在後頭！
利世民