喺撤回與不撤回之間，原來係有好多選擇。好似噚日嘅蘇富比中國書畫秋季拍賣會咁，佢哋有300幾件拍賣品，當中估價高達1,280萬元嘅張大千名畫《擬唐人秋郊攬轡圖》，喺拍賣前有一位聲稱係幅畫擁有人嘅陸介鏗，報警兼入稟法庭要求禁止拍賣幅畫。

警方遲啲會搵蘇富比

面對爭議，蘇富比話將事件交咗畀律師處理，噚日拍賣會中抽起咗幅畫。嗱！唔係擱置、唔係撤回，係抽起呀，簡直係袋錢落狼英個袋，第日又可以有多一個說法。引發呢場名畫擁有權爭議嘅陸介鏗，據稱係民國傳奇建築商人陸根泉個女，現已出家為尼。佢嘅代言人林先生話幅畫係陸介鏗結婚時父親送畀佢嘅禮物，但幅畫交畀他人託管後下落不明，希望法庭頒令佢係真正物主同埋索取賠償。高院排咗期今個月26號處理佢嘅臨時禁制令申請。有消息話，警方都搵咗陸介鏗攞料，遲啲會搵埋蘇富比。拍賣會中其他張大千嘅畫作照舊拍賣，仍然大受歡迎，佢嗰30張畫合共成交價（連佣金）逾5,000萬元，其中《嘉耦圖》同埋《水殿風來暗香滿》都以過千萬元成交。