日本型男齋藤工昨日訪台，為佢執導嘅首套長片《blank 13》宣傳造勢，該片編劇橋本幸治亦有同行。演而優則導嘅齋藤今日接受當地傳媒訪問時被問到，電影早前獲得國際影展大獎肯定，對於自己獲好評，齋藤又點睇？佢話：「我的主業還是演員，光當導演是無法混飯吃的。」佢仲話如果想以導演當做主業，一定要再進修。

問到憑《晝顏》走紅嘅齋藤，怕唔怕被定型？齋藤話自己其實唔在意，仲話：「因為有這樣的形象，我才能抓住了更多的機會，多了許多表現自己的空間。在那之前我只是個不賣座的小咖，所以非常感謝。」對於自己經常被稱為「性感男星」，佢坦言鍾意呢個叫法。

再被問到佢身為演員嘅魅力點喺邊時？齋藤一臉正經答：「劇酬很便宜吧！」搞到在場記者聽到O晒嘴，之後佢先「補鑊」話：「我開玩笑的啦，我沒有在管錢那些東西。」

至於噚晚嘅電影首映禮，假座台北京華城舉行，心繫台灣花蓮地震嘅佢除咗喺日本義賣電影周邊商品之外，赴台前更請電影公司代訂1,000個正港花蓮麻糬，招待現場fans，同時幫助花蓮賑災，齋藤表示：「花蓮是個好山好水的地方，希望大家繼續支持花蓮觀光。」

精選娛聞，喺晒《娛果》
http://fb.com/appledailyent