「遲遲年月，難耐這一生的變幻」
—《夕陽之歌》

人到38歲，再不能扮清純玉女了吧？梁詠琪（GiGi）一改戲路，飾演過氣整容名模，要裝「胸」作勢，又僅穿內衣通屋走，是從影以來一大突破。那一幕泳池邊高炒36F深溝，惹人遐想，她更要與古仔大演床戲，以及賣肉扮殭屍拍電影。GiGi極滿意彭浩翔賜予她的假大胸：「導演真係……係佢諗到擺喺我身上，好有創意，佢話搵我原因係知我冇整過容，因為整過一定唔會拍，會忌㗎嘛！另一樣係，雖然話係滿足佢對女性fantasy，其實又何嘗唔係滿足咗我一個夢想。」
GiGi拍攝《香港仔》的另一得着，就是其西班牙籍老公Sergio看完電影後，加深了解香港家庭的倫理關係，她說：「佢睇得明，包衣紙有解釋，因為成個story無論發生喺香港又好，發生邊個年代都好，都係講一個家庭，喺入面佢仲睇到不一樣嘅我。」
至於Sergio在大銀幕看GiGi跟古天樂的床戲有何反應？她說：「我老公加多一個評語，係就算有呢啲場面，都係有class嘅。今日我唔止做戲唔同咗，其實做人都係，係生活帶畀我，令我個人relax，無後顧之憂，投入做我喜歡嘅嘢。」

感嘆娛圈虛浮

不過，戲中有一場講述GiGi被邀約出席賣淫飯局，令她感受良多：「第一場陳輝虹叫我拍戲，原來係叫我陪老細，嗰場我真係堅嬲，我覺得被侮辱同好hurt。雖然我喺呢行冇遇過呢啲情況，嗰刻會諗娛樂圈名利好虛浮，假若有一日我發覺自己冇呢個價值，好唔踏實，會冇安全感，俾監製咁樣對待，我會覺得侮辱！」
撰文：楊潔雯