無論男女老幼，甚至動物都好，講到底都係最緊要健康。好似女神舒淇咁，幾日前仲喺Instagram度貼咗段片，話自己去咗醫院度抽血做身體檢查，睇吓自己嘅身體邊出咗咩事（新聞連結： http://bit.ly/28RlfAV ），又留言話：「免疫系統啊！免疫系統啊！我對你好一點，你快點好好嗎？」搞到網民紛紛叫佢要聽醫生話，放個長假好好休息。

話口未完，今日舒淇喺Ig貼相，影咗自己包藥出嚟，仲留言話：「這副作用好恐怖」，睇清楚啲，發現包藥上寫住會出現「噁心、嘔吐、腹瀉、血便或血尿；蕁麻疹；皮膚紅點；發燒……手指或腳趾麻木感；掉髮等」等副作用，就咁數一數都成10樣，都真係幾多，難怪女神都被嚇親。再睇埋，呢隻藥係畀痛風症病人作緩解同預防，希望舒淇食完藥有用，快啲好番。

咁啱得咁橋，舒淇隻愛貓Maymay麵原來近日做咗絕育手術，舒淇今日貼咗條片上Ig，見佢不停對住隻躲在衣櫃裏的貓saysorry，然後佢再留言話：「知道你痛痛不舒服，但是為了你的健康，你還是要變公公，對不起啦，快快好喔」，可惜，貓貓唔多領情，一直皺埋眉頭嬲爆爆，仲索性扭歪面唔睬媽咪舒淇，唉，不過都係為住健康好，嬲一陣好喇。