10月7日推介東江集團（2283），當時1.37元，昨報1.87元，三周累升36%，噚日單日炒高8.7%，完美破頂兼到價，催化劑係大股東李沛良上市後首次喺市場掃貨，平均價1.589元，持股量突破六成。低位升咗咁多都仲搶？唔使我話你知原因喇啩，今次用10倍PE做目標，剛好睇2.2元。
除增持外，回購亦係推高股價嘅好工具。冷灶股中華汽車（026，中巴）9月起連環回購，之後一個月喪升四成，正宗「一日唔發市，發市當三年」。按圖索驥，另一冷灶股安全貨倉（237）開始異動，值得關注。
安全貨倉上市以來從未曾回購，不過佢同中巴有一個共通點︰禾稈冚珍珠！翻查安全貨倉最新業績，手上物業總值27億銀，當中包括位於柴灣及葵涌全幢貨倉，連同淨現金及存款2.3億銀，每股NAV高達22.5元。嘩！現價只得11.28元，豈非半價大平賣？公司本身業務亦四平八穩，貨倉營運及物業投資盈利按年增長25%，最新PE僅7.4倍。