張達明夥拍農夫將於3月喺灣仔伊館舉行三場《達ming農夫棟篤唱已經爆咗》，聽日起公開售票，今日晏晝三位主角喺深水埗西九龍中心宣傳，齊齊將一個貼有字句「已經爆咗」嘅氣球夾爆，寓意開騷爆滿。

現場亦首播農夫為騷創作新歌《表演者》，首歌達明都有份唱，C君表示對上一次三人開騷時，達明身體狀況冇咁好，所以冇特意要合作唱歌，但o依家達明狀況好好。

善於棟篤笑演繹嘅達明今次大展歌喉，不過唱幾多就賣關子先，達明稱：「會當演唱會咁做，不過農夫佢哋有dancer，我冇，唔可以摸住talk，啲資源用哂嚟請dancer。」

話明talkshow，達明又點少得講社會政治呢，達明話：「會有，但想等埋3月，例如高鐵批唔批呢啲大題材，到時會擺落去。」

達明亦預咗敏感話題惹爭議，問到佢擔唔擔心，達明講：「指被禁嗰啲?」C君話：「最怕冇反應啫。」達明笑言：「到時咪話秋生叫我講㗎囉，講笑啫，佢都只係會講我愛你，香港文化好好呢啲。」