周日澳職季後賽上演另一場淘汰圈比賽，珀斯光輝繼常規賽煞科戰以5:4擊敗墨爾本城，今仗就算作客都一樣再贏，憑中場迪亞高卡斯度同前鋒祖爾捷安尼斯上半場各建一功，以2:0贏波晉級，準決賽將面對常規賽冠軍FC悉尼。墨城出局，最慘係老將卡希爾，就算賽前喺社交網站上載圍圈鼓勵隊友嘅相片都冇用，今季加盟依然幫唔到手，37歲仲未贏到首個聯賽冠軍。