開場前兩人互換身份，星如踩車、Sarah戴拳套，分享環節仲有唔少笑位，最搞笑係大會叫佢哋帶一樣嘢到講座，星如帶咗上月初第20場連勝嘅WBO國際金腰帶，佢話：「呢條腰帶令我感到我距離挑戰世界冠軍又近一大步。
最估唔到係Sarah帶咗支四色筆連擦膠！Sarah話：「我有諗過帶倫奧銅牌嚟，但我覺得獎牌唔代表啲咩。」呢個時候，啱啱分享完金腰帶嘅星如即時尷尬笑起嚟，Sarah即時補鑊：「唔係，獎牌都好有價值，但唔係只有獎牌代表我哋嘅人生。」Sarah話四色筆可以提醒自己：「人生做咗好多嘢，我哋攞咗好多獎牌，但榮譽會因時間而過去，唯一可以做嘅係繼續寫你嘅人生，唔係用你以前嘅光輝去成就以後。」
星如話：「Sarah呢種思維好值得學習。」另外，星如被問到怕唔怕輸，佢就話只要付出百分百努力，享受過程，輸都冇所謂；兩人互動差不多兩個半鐘，精華版會喺下月21日下午六時喺無綫、同日晚上八點半喺港台電視31及31A播映。