筱靖、陶枳樽噚晚喺九展出席《齊木楠雄的災難》首映禮，筱靖着黑色透視裙性感撐場，佢笑話太耐冇現身，驚啲人唔記得佢，所以着得性感啲，引起大家注視。講到佢間德國餐廳生意，佢話：「最近海洋公園搞咗個歌酒節，我都有份擺檔，佢哋搞咗一個明星餐廳銷售量比拼，我哋嘅成績唔錯，呢個禮拜都係冠軍，其他藝人仲有傅佩嘉、蕭潤邦、蕭正楠嘅串燒，呢段時間我都喺現場幫手煎腸仔，好多朋友嚟捧場，見到我一頭油煙。」

筱靖仲話因為自己太落力去做生意，媽咪都問佢係咪退居幕後：「我話至少捱過呢個月先，同事咁努力，我冇理由唔理。其實我都有個網上節目，訪問中小企創辦人。新年打後生意收入係幾好，自己有六位數賺，諗住用筆錢嚟買舖投資。」

另外，陶枳樽話自己好鍾意日本電影同日本文化：「細個好鍾意睇漫畫，試過喺動漫節扮春麗，以前化妝技巧唔好，睇番啲舊相都嚇親自己，不過啲衫好貴，成千蚊一件，所以cosplay機會唔多。」

精選娛聞，喺晒《娛果》
http://fb.com/appledailyent