早前內地驚爆熊黛林（Lynn）有喜，但係因為郭富城無情竟要求女友墮胎，前晚消瘦不少嘅Lynn聯同林峯、毛舜筠等到灣仔出席電影《男人如衣服》嘅煞科宴，Lynn獲林峯送上金豬禮券，林峯仲笑笑口話希望Lynn現實中能夠用得着，Lynn回敬話：「承你貴言。」

「墮胎好缺德」

Lynn親身否認傳聞，又強調只係整親腰骨：「啲人成日寫呢啲嘢，愈寫愈低能，我冇嬲，好寃枉，只係喺屋企乖乖休息，都俾人寫成咁。」至於城城有冇呵番，Lynn就甜笑話城城工作好忙，而且失實報道年年都寫幾次，次次都嬲佢會好唔得閒，不過佢就話自己一定唔會殺生，因為好難得機會先有BB，仲話：「如果唔要係好缺德嘅事，係一條生命唔可以話唔要，不過我知有網友信。」提到今年係咪用得着張金豬禮券，Lynn話今年冇可能，又甜到漏咁話唔再講論婚期，萬一冇得嫁就大件事。
而城城噚晚去尖沙嘴出席Gucci活動，提到墮胎傳聞，佢同Lynn口徑一致，佢話：「呢件事網上流傳，睇完我一路沉默，啲人講完唔負責任，唔想澄清，Lynn都講咗四個字『妖言惑眾』嚟回應，講呢啲嘢嘅人好傷害，我亦都好無奈。」城城派定心丸話如果有BB一定唔會唔要，因為係上天賜，亦都係福氣。