立法會財委會噚日討論多項撥款申請,最注目嘅係迪士尼擴建計劃。計劃最後獲通過,但政府都抹咗一額汗。
話說財會先討論電子病歷系統撥款時,主席卿姐放寬每個議員平日約5分鐘嘅發言同問答時間,有泛民議員發言甚至去到近10分鐘,連醫學界嘅梁家騮都話,平日又唔覺大家對呢個題目咁多問題。卿姐解釋,放寬發言時間係因為電子病歷系統嘅問題比較複雜。
到差唔多5點鐘,先通過7億元電子病歷系統撥款,開始討論迪士尼計劃。但噚晚係民建聯黨慶酒會嘅大日子,陳鑑林仲開到口,同商務及經濟發展局常秘蔡瑩璧講,話個酒會好重要,叫政府自求多福。
唔少民記議員都一度去咗酒會,但到咗關鍵時刻,佢哋又一一回歸投票支持。個計劃就過咗,但因為迪士尼傾到夜晚7點幾,要散會,抗疫撥款惟有押後到下星期。