由韓國男星朴敘俊跟女星朴敏英合作嘅tvN人氣韓劇《金秘書為何那樣》現時喺各地都人氣高企，港劇迷亦可以喺亞視觀看，噚晚《金秘書》播出第六集，「雙朴」關係漸漸明朗，即時帶挈收視創新高，達7.687%，創開播以來嘅收視紀錄。

噚晚一集承接上集朴敘俊想咀朴敏英，點知腦海閃過兒時痛苦經歷，喺下意識下就一手推開朴敏英，令到朴敏英大感不滿，初吻竟然喺咁嘅情況下發生。而朴敘俊知道自己唔啱，於是就陪朴敏英進行平民式嘅約會，又陪朴敏英搭巴士及夾公仔，令朴敏英十分開心，令朴敏英唔再嬲朴敘俊。

而朴敏英亦喺無意間得知，兒時同佢一齊被誘拐嘅哥哥就是幽明集團嘅兒子，朴敏英認為那位哥哥就係朴敘俊，所以佢先會對膠帶產生恐懼，點知朴敘俊嘅哥哥李泰煥亦都曾公開自己曾被誘拐，令到朴敏英都唔知邊個先係那位哥哥。而朴敏英直接問朴敘俊，但朴敘俊就沒好氣話被誘拐嘅人係哥哥，兩人又再面左左。

朴敏英於是再去問李泰煥，李泰煥表示自己有被綁架過，但卻唔記得當時發生嘅事，又指細個被朴敘俊欺負，所以令佢被綁架。聽到李泰煥之言後令朴敏英大感震驚，當佢到朴敘俊屋企上班時，竟然喺書房搵到自己當初應徵嘅履歷，眼見自己係咁多應徵者中資5最差嘅一位，令佢大感困惑，此時朴敘俊就現身，並反問朴敏英：「你係唔係好好奇，我請你嘅原因？因為你係微笑(朴敏英劇中名字金微笑)，你係金秘書。」而下周一集朴敘俊就會同朴敏英結束曖昧關係，要求正式談戀愛，唔知朴敏英又有乜反應呢？

更多韓流，喺晒《娛果》
http://fb.com/appledailyent