新城噚晚派樂壇成績表，張敬軒以3獎成大贏家，謝安琪（Kay）就以2.5獎緊隨其後。

張敬軒受訪時，講到大贏家係要靠背後同事努力，咁多人勤力之餘都要有運。之前軒仔同新城合作開演唱會，軒仔都承認可能有友情分：「不過友情分唔代表可以換到一個獎座，今年係自己入行十五年，頭先喺現場有一種接棒感覺，好多有代表性嘅獎項，都係我哋呢輩歌手攞到，有份使命感。」佢話對今年其他頒獎禮嘅歌曲獎有信心，不過個人獎唔敢諗咁多，驚到時失望。

軒仔又主動講到天氣轉冷，劉德華唔舒服要取消演唱會：「華哥係一個好上心嘅人，不論對佢嘅fans、對佢嘅心情，知道要腰斬好多人都心噏，呢個演唱會一票難求，好多人都喺五湖四海到嚟，作為表演者，如果身體出事唱唔到會好內疚，好明白佢心情。希望佢快啲好番。」

Kay噚晚得獎時冇演繹番得獎歌曲，佢受訪時透露患上感冒，雖然係康復緊，但把聲仍然唔係好得。至於佢所拎嘅2.5個獎，另外0.5個獎係屬於古天樂嘅，因為係佢哋首合唱歌《(一個男人)一個女人和浴室》得獎，Kay話係首次贏到合唱獎項，得獎後都有影相畀古天樂睇。

古天樂早前講過，好希望有時間支持樂壇頒獎禮，不過原來連Kay都未知幾時會見到佢，Kay話：「古生佢話都好想嚟支持，不過要拍戲同宣傳，度期好困難，佢都盡力希望嚟到。」但佢又笑言：「古生話，就算佢好感恩可以出席支持，佢都冇話會唱歌，佢一直都話唔唱現場嘛。」

另外有報道指老公張繼聰同蕭定一滿約，之後會加盟麥浚龍（Juno）公司，不過Kay就話老公工作得好開心：「冇聽過，據我所知，老公同蕭生好愉快，雖然公司有啲變動，不過老公工作冇變，仍然有戲拍同接廣告，收入都冇影響，相信會再合作一段時間。」對於夫妻檔工作，Kay就好搞笑咁講：「冇特別想，咁大年紀唔好再搞呢啲辦公室戀情。」

精選娛聞，喺晒《娛果》
http://fb.com/appledailyent