吳卓羲今日喺炮台山為一間茶餐廳擔任剪綵嘉賓，從未做過生意嘅佢，擔心如果同朋友合資會有拗撬，不過佢都有打算同朋友夾份開汽車護理店，佢話：「以前有諗過開茶餐廳，不過做老闆要4點起身買餸，仲早過拍劇，太辛苦所以冇乜考慮，以前我細路仔成日去茶餐廳、冰室，追女仔都去冰室，因為冇錢去鋸扒，去冰室食鐵板餐已經好開心，仲要自己死慳死抵儲錢去食，所以一個禮拜先去一兩次。」

提到阿羲o依家拍緊《飛虎極戰》，佢透露要月尾先至拍完：「因為之前要籌備，所以遲咗半個月先開劇，o依家好多演員都冇期拍，好似張兆輝、吳岱融已經到晒期，但係佢哋都未拍晒，我都日日不停咁拍，差唔多仲有100場戲，我係最早開工，最遲收工。」好多工作都接唔到？阿羲話：「其實一直都有接，我應該緊接一部電影，可能要疊少少(時間)。」